Z Chóśebuza/Cottbus. Paralelnje ku kompaktnemu kursoju Šule za dolnoserbsku rěc a kulturu wót 9. do 14. julija buźo lětosa prědny raz póbitowanje za źiśi. To buźo „Rěcna źěłarnja – zmakanje z serbskeju rěcu“.

Zgromadnje ze źiwadłoweju pedagogowku a wulicowarku tšojenjow Dörte Hentšelojc comy se grajucy a ceło, ze śełom a dušu, do swěta serbskeje rěcy zanuriś.

To buźo wót pónjeźele do pětka. Cas za to wuknjenje buźo pśecej wót zeger 9:00 zajtšo do zeger 15:00, a to we Dolnoserbskem internaśe. Wobjed buźo zgromadnje z dorosćonymi wobźělnikami. Pśiś mógu źiśi we starstwje wót 5 do 12 lět. To płaśi za kuždu małku paršonu 30 euro dogromady, wobjed jo z tym teke zapłaśony.

Na kóńcu źěłarnje comy se zmakaś z dorosćonymi wobźělnikami kompaktnego kursa rěcneje šule a comy naše wuslědki zajźonego tyźenja mjazsobnje pśedstajiś. Dalšne informacije dajo pó pśipowěźenju w lisće za starjejše.

Znaśa serbskeje rěcy njejsu pominane, ale na nje se źiwa we kursu (źiśi ako eksperty).

Organizatorka togo kursa jo Domowina – Župa Dolna Łužyca z.t. w kooperaciji z Rěcnym centrumom Witaj.