Z Rownego/Rohne. Z Rady starostow pśi Iniciatiwje za Serbski sejm su wustupili dr. Hartmut Leipner, Mjertyn Cernja a René Kochan. Dr. Fryco Libo „dajo swójomu amtoju wótpócywaś“. Maksimilian Hasacki z Dešna jo nadalej cłonk rady, teke Till Wojto z Lipska, rownož wót njogo se nic njesłyšy. To su sebje gronili cłonki Iniciatiwy za Serbski lud a Rady starostow stwórtk na wobradowanju w Rownem. Wóni su se tam rozgranjali dla zmakanja z dolnołužyskimi cłonkami Rady starostow pśed tśimi tyźenjami, źož njejsu se mógali wujadnaś (Casnik jo pisał: Dr. Leipnerowa frakcija jo se kradu wugroniła pśeśiwo jěsnemu wuzwólowanju, kótarež iniciatiwa jo forsěrowała).

Hanzo Wylem-Kell jo wulicował wót dobywanja dalšnych starostow w Dolnej Łužycy, ak by k wuzwólowanju stojali. Sympatizanty, z kótarymiž jo rozgrono wjadł, njekśě dla wšakich priwatnych wobstojnosćow take brěmje njasć. Dalšne „multiplikatory“ namakaś, wóstanjo stakim wažna nastupnosć – jo naspjet měniła powědarka Rady starostow za Górnu Łužycu Jadwiga Pjacec.