Do redakcije jo gano pśileśeła tužna powěsć. Něgajšny wjednik Instituta za sorabistiku a profesor za sorabistiku we lětach 1993-95 Ronald Lötzsch jo na 16. juniju we starstwje 86 lět wumrěł. Jogo znajo hyšći wjele serbskich luźi, ako su w Lipsku studěrowali.

Ronald Lötzsch jo studěrował rusistiku na Leningradskej uniwersiśe. Wót lěta 1961 jo źěłał na Akademiji wědomnosćow DDR, zaprědka na instituśe za slawistiku, pózdźej na Centralnem instituśe za rěcywědu. 1962 jo promowěrował na Humboldtowej uniwersiśe w Barlinju z disertaciju ku kategoriji duala w serbskej rěcy Die spezifischen Neuerungen der sorbischen Dualreflexion, ak jo se wudała ako knigły. Wót 1973 do 1979 jo nawjedował wšake slěźarske kupki na pólu slawistiki, finougristiki a balkanologije. Pózdźej, až do lěta 1982 jo nawjedował slěźarsku kupku za gramatiku a strukturowu typologiju. 1993 jo wordował pówołany na katedru za sorabistiku na Lipšćańskej uniwersiśe, a z tym zrownju jo wón tam był za wjednika Instituta za sorabistiku.