Z Chóśebuza/Cottbus. Na swójom slědnem zmakanju pśed lěśojskeju pśestawku jo se zaběrało pśedsedarstwo Domowinskeje župy Dolna Łužyca kóńc julija mjazy drugim z nowym mytom Mina Witkojc, kótarež co Bramborske ministarstwo za wědomnosć slěźenje a kulturu (MWFK) pósćiś wósobam, ako se wósebnje za zdźaržanje a wuwijanje dolnoserbskeje rěcy zasajźuju. Hyšći až do 31. awgusta mógu komuny, towaristwa a zjadnośeństwa naraźenja zapódaś. Teke župa jo se dojadnała na jadno naraźenje za to myto. Pócesćeńske zarědowanje wótmějo se dnja 6. oktobra w Hochozy a to pśi góźbje dopomnjeńskego zarědowanja ku cesći ceptarja a basnikarja Mjertyna Gryza.

Dalej su cłonki nominěrowali Franka Kosyka ako zastupnika župy we wuběrku za zjawnostne źěło Domowiny.