We wustajeńcy pokazuju film „Großmutter und der Wolf“ z lěta 2011 wót Andreasa Schnögla. Dokumentaciju jo wuměłc wjerśił w brunicowej jamje Wochozy. W 42 minutach wulicuju Edith Penkowa, jaden jagaŕ a jaden gólnikaŕ wót Vattenfalla. Foto: Filmstill 
Wustajeńce ze serbskeju tematiku abo ze serbskimi wuměłcami njejsu rědke. Za Dolnu Łužycu su pśisamem wšykne take w Serbskem domje w Chóśebuzu abo w dešańskem muzeumje. Mało pak jo tych góźbow, až teke zwenka „serbskego swěta“ serbske wuměłstwo abo wuzěła serbskich wuměłcow wustajiju.
Śim rědnjej ga jo, až taka wustajeńcu běžy tuchylu w chóśebuskej galeriji Haus 23 na Marijnej droze 23. Wót lětosnego 29. junija prezentěrujo tam „Gebrochene Landschaften“ pěśoch wuměłcow: Andreas Jung, Thomas Kläber, Michael Kruscha, Jürgen Maćij a Andreas Schnögl.
„Gebrochene Landschaften“ zaběrajo se z brunicowymi jamami we Łužycy a w Rheinlandskej. Tam jo Matthias Jung wótmólował we nocy a wustajijo na wjelikich formatach zgubjone domy a jsy. Teke pla akcijow pśeśiwnikow tych jamow ako „Ende Gelände“ jo był pódla ako fotograf.