Slědny kóńc tyźenja w juliju jo Domowinska młoźinska kupka w Bórkowach pśepšosyła na 125. łapanje kokota. Wobydlarje a jich gósći su raźi pśišli, wóni wšykne byli narske, chto wót tych rejtari buźo mjazy jubilejnymi kralami. Nichten njejo licył z wjelickimi pśechwatanjami pód swěźeński wupyšnjonymi cesnymi wrotami.

Bórkowy/Burg. Domowinska młoźinska kupka Bórkowy ma jadnab 50 cłonkow, a wóni su wjelgin angažerowane, což jo se teke pokazało slědny kóńc tyźenja w juliju pśi łapanju kokota. Žnjowny nałog tudy pśiśěgnjo kužde lěto hejnak magnet hunderty pśiglědowarjow. Něco wósebnego jo był lětosny jubilejny kokot z wjele hundert pśiglědowarjami a pśiglědowarkami.

„Ja pśijědu pśecej rad do Bórkow sebje woglědat to wuběźowanje młodych muskich. Něga som sam był jaden dozwažny a wuspěšny rejtaŕ pśi kokotach“, jo gronił 82-lětny Kurt Jurischka z Bobolc/Boblitz.