Z Dešna/Dissen. Wót 1. awgusta ma Babette Zenkerowa zasej słužbu w Domowniskem muzeumje Dešno. Jadno lět jo była wjednica muzeuma wulichowana wót źěła, aby swój cas priwatnym wěcam pósćiła. Jo była cesćej pla enkelźiśi, jo pak teke pśez wšake strony w Nimskej kólasowała. A jo se pśi tom woglědała, kak druge muzeumy pód gołym njebjom wuglědaju a źěłaju. Na taki part jo nazběrała wjele nowych idejow a jo Casnikoju groniła, až se z fryšnym elanom do źěła dajo.

Kathrin Šwjelina, kótaraž jo ju w casu njepśibytnosći zastupiła, wóstanjo z poł městnom w dešańskem muzeumje. Kužda wót njeju źěła něnto z poł městnom; gmejna płaśi źaseś źěłowych góźin wěcej za muzej. „Mamy wjelgin aktiwne spěchowańske towaristwo a wjele togo źěła w muzeumje cyni se cesnoamtski“, jo chwaliła wjednica muzeuma. „Ale naše aktiwne cłonki njebywaju młodše a njamógu wěcej we tej rozměrje za nas źěłaś.“ Dlatog jo notne było późěl głownoamtskego źěła pówušyś. Až na muzejowego pedagoga su wšykne źěłowe městna (tśeśa jo Melanie Mücksch) casowje njewobgranicowane.