Z Narća pla Wórjejc/Nardt. Domowina co swójich cłonkow se wopšašaś, kak glědaju na źěło Domowiny a co jo jim pśi tom wósebnje wažne. To jo wobzamknuło zwězkowe pśedsedarstwo Domowiny na wobradowanju w Narću (Nardt) pla Wórjejc na slědnem dnju awgusta. To wopšašowanje jo anonymne a wobstoj z 25 pšašanjow. Na njom mógu se wobźěliś teke te, ak njejsu cłonki Domowiny daniž cłonki jeje towaristwow. Formular z pšašanjami buźo we tśich rěcach spisany a we 3.000 eksemplarach śišćany: na górnoserbske, dolnoserbske a nimske. Wužywarje interneta budu móc jen teke online wupołniś. Wenkowna firma z Lipska buźo rezultaty zwězkowemu pśedsedarstwoju naslědku prědkstajiś.
Z tym wopšašowanim wuwjeźo Domowina to wótmyslenje, kótarež jo wordowało do źěłowych směrnicow (Richtlinien) zapisane a na głownej zgromaźinje łoni wobzamknjone: nutśikownu a wenkownu komunikaciju Domowiny pólěpšyś.