Z Bórkow/Burg. Dnja prědnego septembera smy swěśili naš jubilej pśi góźbje 170. lětnego wobstaśa dolnoserbskego tyźenika. Na to smy pšosyli – kaž tež na swěźeń bórkojskeje Domowniskeje jśpy. Wjele luźi jo pśichwatało, wóni su woglědali do wustajeńce wó Minje Witkojc w Domowniskej śpě, pśisłuchali muzice, soburejowali a se woglědali pyšne serbske drastwy, ako moderatorka Marlene Jedrowa jo pśedstajała. Słyšaś było jo teke to jadno a druge ze zachadnosći Casnika. My ga smy nejstaršy casnik (abo cajtunga) w našych stronach, toś smy měli wjele wulicowaś. Za luźi pak njejo to było suchy a dłujki pśednosk, ale rozdźělony na wšake programowe dypki. Rozmjej: Muzika ga jo teke była a rucnikarstwo su teke pśedstajali.
Wjeliki zeger jo symbolizěrował zachadne 170 lět, a pśi tych dwanasćo štundach, na kótarež špěra pokazujo, su stojali wšake wažne lěta. Na nich su redaktorce a redaktor se orientěrowali a wót tych lětow wulicowali. Wjele wót togo su naše lazowarki a cytarje južo cytali w našom historiskem rěźe.