Lube źiśi,

gano su turjańske swěśili, až jich źiśownja wobstoj 50 lět. Wšak wužywaju dom źinsajšneje źiśownje južo 50 lět za wobstaranje źiśi. Ceło taka młoda ale źiśownja njejo. Pšawa źiśownja jo w Turjeju južo wót 1958. Nejžpjerwjej jo była w „Domje pioněrow“ pódla stareje kjarcmy „Běły jeleń“. W domje źinsajšneje źiśownje jo była góletkownja.

Zachopjeńki źiśownje su byli wokoło lěta 1950. We tom casu su how měli žnjownu źiśownju. Rozmjej: W casu žnjow su mamy musali wjele źěłaś. Njejo za nje lažko było, se wó swóje małke staraś. Toś su zachopili, źiśownje zarědowaś.

W lěśe 1993 su wobej gromadu spórałej. How chójźe źiśi z Turjeja, Grěšneje a Picnja. Tuchylu jo jich 42. „Pśiduce lěto změjomy ‚baby-boom‘ we jsy. Pótom mamy zasej dorost“, jo groniła wjednica Heidrun Stecklina. Wóna buźo swój amt něnto dalejdaś młodšej kolegowce. To jo Kathrin Fieberowa.

Kuždy drugi tyźeń maju pśedšulske źiśi serbsku wucbu: Jennifer Dünnbierowa pśiźo a wuknjo z nimi. Tomu se groni „Sorbisch mit Jenny“.