Z Njebjelčic/Nebelschütz. Iniciatiwa za Serbski sejm a kandidaty z Górneje a Dolneje Łužyce, ak za Serbski sejm kandiděruju, su se zmakali sobotu tyźeń tudy na „wuzwólowański wjeršk“ (Wahlgipfel). Za powěsću Serbskich Nowinow su wóni pśewjadli źěłarnicku (work­shop), źož su wobradowali a sebje gronili swóje myslenja a we praksy wopytali, kak Serbski sejm dej we pśichoźe źěłaś, co co dosegnuś a kak budu se tam diskusije wjasć. Wóni su pód nawjedowanim moderatora Johannesa Heimratha „na probu“ wobradowali a wopytali, z pśeśiwnych měnjenjow konsens dostaś a se wujadnaś. Pśi tom su sebje wuzwólili kontrowersnu temu ‒ termin wuzwólowanja. Pśeto něnto jo 3. nowember wustawjony ako kóńcny termin, źož wuzwólowarje mógu z listom swóje głose wótewdaś a źož te głose worduju pśelicone. Někotare cłonki iniciatiwy, mjazy nimi šołta Njebjelčic Tomaš Čornak, su raźili, až ten termin dejali na pózdźejšy cas wótstarcyś, aby měli cas ideju sejma luźam intensiwnjej prědk stajiś a dalej rozkładowaś. Někotare su se za­zwólili, až budu to wósobinski cyniś.