Pśedzachadnu njeźelu su na Njepilic dwórje w Rownem 15. kjarmušu swěśili. Wjele luźi jo se pśipórało, nad cymž se wjaseli Manfred Nickel, pśedsedaŕ spěchowańskego towaristwa Njepilic dwóra.

Zapšawym jo kjarmuša cerkwiny swěźeń, ale tak wusko to nicht wěcej njewiźi. Z muzikaliskim programom grodkojskich dujarjow (Bläsergilde) jo kjarmuša była rědna zgromadnosć z tykańcom a skibkami. Tykańc su južo źeń pjerwjej pjakli, a to wót zajtša rano. Žeńske towaristwa su zasej wugbali wjelike źěło za to.

„Na lětosne žni jo se ta suchota kradu wustatkowała. My na Njepilic rolach ale mamy dobre pówóźowanje (Bewässerung) a togodla su nam jagły derje njasli“, jo gronił Manfred Nickel. Tak lažko stakim njamóžoš rowniskim do jagłow duś. „Pór snopow smy wóstajili, je comy źiśam pokazaś. Chto ga źinsa hyšći wě, kak jagły rostu? Zbytk nažnetych jagłow smy darili zwěrjeńcoju we Běłej Wóźe“.