Cyncara (Zielscheibe) z lěta 2010, do kótarejež hochoske jagarje su stśělali pó hubertusowej góńtwje wó titel krala stśělby. To wóni cynje kužde lěto, a kuždy jagaŕ abo gósć smějo jaden raz do cyncary stśěliś. 2010 jo Fryco Wojto ten titel dobył, a ta cyncara wisy wence na jogo dwórje. Lětosnu cyncaru njejsmy wótmólowali, ale smy zgónili, až tenraz jo z wótmyslenim wjelk był na njej namólowany, což dej se ako politiske wuznaśe interpretěrowaś. 
Z Hochoze/Drachhausen. Prědnu sobotu we nowemberje, kradu na dnju swětego Hubertusa, patrona jagarjow, su hochoske jagarje pśewjadli zasej hubertusowu góńtwu. Wóni su se zajtša zmakali pla jagarja Lutza Sandmanna na Pěskach na fryštuku. K znamjenju, až góńtwa se zachopijo, su tšubili na jagarskich rogach. Pótom su te źaseśo jagarje se wudali z awtami kuždy na swójo pśipokazane město na pólach a łukach wokoło Hochoze. Jim su pomogali wósymjo gónjarje, ako su we cerwjenych bruslacach, zogolecy a se źerucy, gnali wót Grabowiny, pśez Krě až na Brusne.
Naslědku jo wordowała jano jadna sarnja zastśělona. Ten jagaŕ, ak jo ju trjefił, jo Maik Duhra (50). Z tym jo wón dobył lětosa titel krala góńtwy. „Wjele sarnjow smy wótnazdala wuběgajucych wiźeli, ale jagarje njejsu do nich stśělali“, jo nam wulicował hochoski šołta Fryco Wojto, kótaryž jo južo wót swójeje młodosći ako gósć na góńtwje kužde lěto pódla.
