Z Města/Cottbus. W Chóśebuzu pśigótuju se tuchylu serbske wustawki. To by był wjeliki nowum. Do togo daniž město Chóśebuz daniž wokolne serbske wokrejse njejsu měli serbske wustawki.

Toś te „Wustawki města Cottbus/Chóśebuz k spěchowanjeju serbskeje rěcy a kultury“ wopśimjeju na styrich bokach wěcy, kótarež su tomu serbskemu k wužytkoju. Na pśikład, až Chóśebuz naglěda to serbske ako bogatstwo a až pśipóznaśe togo serbskego jo w Měsće wažne. We nich deje byś wěcy wustawjone, kótarež su něnto južo usus, ale by dostali status pśedpisma. Na pśikład to, až su Rěcna šula, Serbski muzej a Dolnoserbski gymnazium w nosaŕstwje Města. „To pśinjaso serbskim wobydlarjam wěstosć“, jo groniła zagronita za serbske nastupnosći Anna Kosacojc-Kozelowa. Nowe jo, až Domowina dej móc pósłaś do tśich wuběrkow zastupnika z raźiśelskim głosom: do wuběrka za nastupnosći mjeńšynow, do wuběrka za pomoc młoźinje a do kubłańskego wuběrka.