Ze Ćiska/Zeißig. Zachadnu sobotu jo Serbski sejm wobradował we tej jsy pla Wórjejc. Pšosony jo teke był Marcel Braumann. Wón jo župan wórjejskeje župy Domowiny a jo signalizěrował wěste wótnapinanje mjazy Domowinu a Serbskim sejmom. Wón jo gronił: „Zjawnosć njama rozměśa za terganje mjazy nami, ako Serby buźomy jano wuspěšne, gaž pokažomy zwólnosć ze sobu kooperěrowaś.“ Brauman jo se w zachadnosći kritiski wugronił napśeśiwo Serbskemu Sejmoju. Za njogo jo ale nadawk Domowiny, angažěrowane Serby zwězaś. Wón njoco we tej župje zbyś luźi, ako se procuju za to nejlěpše Serbstwa.

Głowne pólo za gromadne źěło móžo to kubłańske byś, su pisali Serbske Nowiny. Serbski sejm a wórjejska Domowinska župa cotej gromadu źěłaś. Ale teke dalšne wěcy su wobradowali, pśepowědali a wobzamknuli. Na pśikład su sejmikarje napominali kubłański wuběrk, w Dolnej Łužycy kubłańsku konferencu organizěrowaś ze wšymi akterami. To dej byś reakcija na alarměrujuce wuslědki Witaj-ewaluacije.