Zachopjeńk togo mjaseca jo woglědał bamž Franciskus do Zjadnośonych arabiskich emiratow. Tam jo wukrajnikam dowólone, na wósebnych městnach k swójim bogam módliś se.

Pśed 2000 lětami jo to było w Samariji teke tak. Togodla su byli Samaritarje pó zjawnem měnjenju Žydow grěšniki. Pśeśiwo tomu jo Jezus wulicował pśirownanje wó miłosćiwem Samaritarje (Lk. 10, 30-37). Ten pomaga woporoju rubjažnikow. Z takim mužom se kuždy kśesćijan rad pśirownujo. Ale Jezus wulicujo teke wó dwěma dalšnyma wósobinoma. Jaden jo mjeršnik, drugi Lewit. Lěcrownož stej „fromnej“ luźa, njestaratej se wó wopora njedobrego statka, dokulaž musytej wažnjejše źěła gótowaś.