Z Chóśebuza/Cottbus. Zachadny stwórtk jo Serbski ludowy ansambel pokazał swójo „Ptaškoswajźbowe cowanje – Hochzeit im Märchenwald“ w měsćańskej hali. We srjejźi stej stojałej sroka a wron, wušej togo póbratš (Gerald Schön). Ten jo powědał nimski a serbski, howacej jo se pokazał ako pšawa zaspana Hana, a jo kśěł měś swój pokoj. Tak jo musała se sroka sama staraś a jo pytała w cełej bajkowej góli za swójim nawóženjom. Wóna jo jano serbski powědała.

Wót jeje pytanja se póbratšoju cowa, ako spi we swójom sedle. To jo sroce radne dyrdakojstwo, wšak njejsu jano žaby, ptaški a hajtki ducy w góli. Ně, tam teke hawzujo ten bubak z Barbuka. Wón jo złoźej a jo samo kśěł pupki kšadnuś. To jo se jomu mimo kuliło, a wón jo se pórał do góle. Tam jo zmakał sroku. Wón jo był jeje pyšnostkow kśěty a jo mowzował jeje cerwjeny rjeśazk. Pomagałej stej jomu wjelka. To wšo su rejujucy pokazali, a młoge góle w publikumje jo tšach měło wót teje njelubeje bandy.