Z Chóśebuza/Cottbus. Strukturna změna jo wobzamknjona, něnto kśě wšake aktěry to sobu wugótowaś. Mjazy nimi jo towaristwo „Lausitzer Perspektiven“, ako ma swójo sedło w Ranju. Zgromadnje z Burkhardom Behrom, ako nawjedujo kórjeński „Zentrum für Dialog und Wandel“, su zachadne pónjeźele pśedstajili koncept za nowy „Fonds Zivilgesellschaft Lausitz“ w Chóśebuzu a w Barlinju.

Za ten fonds kśe měś cełych źaseś procentow tych pjenjez, ako su myslone za strukturnu pomoc we Łužycy. To jo dosć wusoke pominanje, za hyšći kradu njekonkretne pśedewześe. Źěłaś dej fonds někak tak ako Gatojska załožba (Teichland-Stiftung). Fonds dej lokalne towaristwa, projekty wobydlarjow a firmy pódpěrowaś, ako su za wšykne wužytne. Wšak njedosega, gaž nowe zeleznicowe cery budu abo spěchowańske programy za firmy. To dej se direktnje a njeběrokratiski staś, fonds dej teke pomagaś luźam pśež „džungel spěchowańskich srědkow“. Łužyca dej wóstaś a wórdowaś atraktiwna za wobydlarje, za to co ten fonds źěłaś.