W Casniku 03/2018 smy foto wót serbskeje swajźby wótśišćali, ako jo tuchylu wiźeś w barlińskem „Museum europäischer Kulturen“. Smy pšašali, lěc něcht znajo familiju abo městno. Muzej jo napisał, až to foto jo z lěta 1920, ze Žylowa. Něnto su nam lube cytarki ze Žylowa gronili, až jich pśiswójźbne su na tom fośe wótmólowane. Lěto swajźby njejo pšawje napisane w muzeju, ta swajźba jo była dnja 6. decembra 1930.

Wjele mjenjow su pótomniki swajźbarstwa nazběrali. Comy Wam nalicyś, ceje te luźe na fośe su. Su tak napisali, ako jo jim znate było.

Nawóžeń jo Albert Mježa (Mescha) z Hažowa. Njewjesta jo Greškojc Anna z Liškowka, na dwórje jeje familije su swajźbowali. Njewjesta jo na fośe někak 19 lět stara.