Z Trjebina/Trebendorf pla Slěpego. Miłoraz jo ta slědna wjas w Sakskej, ako buźo se wótbagrowaś. Na jaden part wobzamknjo pśesedlenje tu wobuznu, wjele lět trajucu njewěstosć wobydlari, na drugi part pak buźo to weto twarda cezura, tak ako za miłoraske wobydlarje, tak teke za cełu trjebinsku gmejnu. To jo srjodu tyźeń gronił trjebinski šołta Waldemar Locke (CDU) z Miłoraza (Miłoraz słuša k trjebinskej gmejnje) na wobradowanju gmejnskeje rady. „Stakim minjo se wjas z wjele hundert lět stareju historiju, z historiskeju najsu, ze swójeju wizu žywjenja a ze swójim twardym zakórjenjenim we domacnej zemi. To wobzamknjenje stanjo se tym k lubu, kenž su póžedali za wěstymi źěłowymi městami we brunicowem górnistwje.“