Z Chrósćic w Górnej Łužycy/Crostwitz. Rěcne rumy woplěwaś a wobzwarnowaś (źož serbska rěc dominěrujo); mócowaś źěło w regionach a slědkoju pódpěraś wobstojece kupki, towaristwa a iniciatiwy ‒ na te tśi słupy jo załožone něnto źěło Domowiny. To jo gronił pśedsedaŕ Domowiny Dawid Statnik na głownej zgromaźinje sobotu pśed dwěma tyźenjoma. Dialog z bazu a nutśikowny serbski dialog stej we jogo gronje wažnu rolu grałej, a wón jo nagranjał zgromaźone k wobjadnosći. We gronach a diskusiji jo dominěrowała starosć wó pśichod serbskeje rěcy a wó serbsku wucbu.

Dialog z bazu – to jo nastupnosć, kótarejž wjednistwo Domowiny jo se mócnjej we toś tej perioźe pśiwobrośiło. Pśedsedaŕ Domowiny Dawid Statnik jo jej pósćił we swójej rozpšawje (Bericht) nejwěcej słow.