(Z diskusije na zgromaźinje Domowiny w Chrósćicach – glej 2. bok). Ewaluacija serbskeje wucby w Bramborskej jo wažna cezura we serbskej šulskej politice. Situacija jo wjelgin komplicěrowana, ale nic mimo naźeje. Až licba wuknikow we serbskej wucbje njejo spadnuła, to jo wjasoła powěsć a dobry zakład za pśichod. To jo groniła na zgromaźinje Domowiny w Chrósćicach cłonk bramborskeje Serbskeje rady Angela Šurmanowa z Chóśebuza. Wóna jo pódšmarnuła, až šulske ministaŕstwo Serbam wumjetujo, až njamaju žednu strategiju, což nastupa cile wucby a jeje rewitalizacije. „To bóli“, jo Šurmanowa groniła, glědajucy na wobstawne a žurne pilnowanja Serbskeje rady wó nowe wustawjenje dla serbskeje wucby.
„Rezultaty ewaluacije pak su teke šansa. Njewužyjomy-li ju, ga pótom njetrjebamy wót Dolneje Łužyce zewšym wěcej diskutěrowaś“, jo Šurmanowa warnowała. Z fachoweju klawsuru (ak pśewjeźo se njezjawnje ten stwórtk) jo zwězana za jeje suźenim naźeja, až budu póstupiś jadnu kšoceń dalej. „My pótrjebamy něnto wšykne mócy“.
*