Z Chóśebuza/Cottbus. Pśed dwěma lětoma su Krajna ewangelska cerkwja (EKBO) a łužyske cerkwine wokrejse załožyli „Centrum za dialog a změnu“ w Kórjenju (Kah-ren). Faraŕ Burkhard Behr jo był wót septemberja 2017 prědny wjednika togo centruma. Dnja 22. měrca su se z namšu rozžognowali wót njogo, ako jo wótedał swój amt. Cerkwina wušnosć a gósći su toś pśichwatali namšu na tom pětku. Oficijalne rozžognowanje a źěkowanje pśed hołtarjom su wobstarali wuša promštowka Theresa Rinecker, něgajšny wušy promšt Martin Herche, promštowka Ulrike Menzel (chóśebuski cerkwiny krejz) a jeje zastupnica, serbska dušepastyŕka Katharina Köhlerowa.