Pó někotarych lětach kněžašo se powšykne měnjenje, až jo matematika na pšawej droze, a wjednik fachoweje konference gronjašo žurnalistam: Matematika jo była, jo, a pśecej buźo – to jo tak wěste kaž jo tśi a tśi styri! To sćicha groni pśibytny fachowy póraźowaŕ (jaden ze slědnych maminolicbnych licari), až su wědobnostniki wobkšuśili, až jo tśi a tśi zwětšego šesć. Wótwisujucy wót baze licenja jo zasadnje móžno, až jo tśi a tśi dwanasćo, jadnasćo abo źaseś, ale styri jo pśisamem teoretiski wuzamknjone. Wjednikoju jo to było pitśku fatalne, a wón kšuśe glěda na fachowego póraźowarja gronjecy: Teoretiski wuzamknjone, groniśo? Wěsćo, my ceptarje smy luźe prakse. Wopytujomy how něco natwariś, wugbamy wažne kulturne źěło, za kótarež budu nam pśiduce generacije hyšći źěkowne. Glědamy slědk na lěta połne wuspěcha, a njedajomy to wobgrozyś wót pśegnatego perfekcionizma. Rozmějośo? Mimo togo, doda, jo šesć doch wěcej ako styri, co měniśo ako maminolicbny? Fachowy póraźowaŕ pitśku zmuśony nygnjo.