Z Lubina/Lübben. We wokrejsu Damna-Błota maju něnto serbski wopon we zalu wokrejsnego sejma. Wón wisy južo pór tyźenjow a jo znamje za to, až we tom wokrejsu serbske komuny doma su.

Na slědnem pósejźenju wokrejsnego sejma pśed wuzwólowanim, 8. maja, jo ten wopon južo na sćěnje zala wokrejsnego sejma wisał.

Až jo k tomu dojšło, jo rezultat procowanjow Domowinskeje kupki Lubin a zagronitego za nastupnosći Serbow we tom wokrejsu Dietera Freihoffa. Ingrid Grošcyna, cłonk Domowinskeje kupki, jo naceriła ten wopon. Domowinska kupka jo nejpjerwjej wobzamknuła, až dej to lipowe łopjeńko w serbskich barwach we srjejźi wopona byś. K dalšnej smybolice groni wuměłcowka Indrid Grošcyna, až symbolika na kšomje wopona, to wobrubjenje, jo wzeta ze symbolow pla jajamólowanju. Słyńcne kólaso jo symbol za śopłotu a nalěto. Zuby wjelkow stoje za zymski cas. Tak groni wobrubjenje wopona, až stoj za cełe lěto.