Ze Serbskego domu. Kužde lěto dwójcy se zmakajotej prezidium Domowiny a pśedsedaŕstwo Domowinskeje župy Dolna Łužyca ku zgromadnemu wobradowanjeju. Z něźi 2400 cłonkami ga jo dolnołužyska župa mjazy 5 župami ta nejwětša, pśisamem kuždy tśeśi cłonk Domowiny pśiźo z tym z Dolneje Łužyce. To groni, až ma w cełej Domowinje wažny a mócny głos a bejny późěl na tom, lěc a kak Domowina swóje nadawki społnijo.

Kak wužytne take zmakanja a rozgrona su, ga jo se gano wótnowotki pokazało, gaž stej se njedawno w Serbskem domje w měsće zasej zmakałej Domowinski prezidium a dolnołužyske župne pśedsedaŕstwo. Głownje jo pśi tom šło wó serbske šulstwo a z tym wó serbsku rěc. Wugódnośili ga su kubłańsku klawsuru, ako běšo se 10. apryla pśewjadła w Chóśebuzu. Wobej boka stej byłej wobjadnej, až jo se wóna raźiła a swój cel dojśpiła. Wugronili su rěcnemu centrumoju Witaj – a to naprědku jogo wótźělenju w Chóśebuzu – pśipóznaśe za to, až su tu klawzuru w krotkem casu derje pśigótowali.