Z Chóśebuza/Cottbus. Statny šulski amt Chóśebuz a Źěłanišćo za serbske kubłańske wuwijanje Chóśebuz (ABC) stej zachadny tyźeń wałtoru pśewjadłej w šulskem amśe źěłaŕnju serbšćiny. Góźba za to cełodnjowne dokubłanje ceptaŕkow a ceptarjow jo była rozpšawa wó eksternej ewaluaciji serbskich póbitowanjow w Bramborskej 2015-2017 (Externe Evaluation von sorbischen/wendischen Angeboten der Primarstufe im Land Brandenburg 2015-2017).
21 ceptaŕkow a ceptarjow z 13 šulow našogo regiona jo se wobźěliło na tom zarědowanju. Ceły źeń su w pozitiwnej atmosferje a połne koncentracije źěłali.
W dopołdnjejšem źělu źěłaŕnje su wobźělnice a wobźělniki pó wuwitanju teke pśez wjednika Statnego šulskego amta impulsowy referat k rozpšawje słyšali a pón w kupkach z moderaciju diskutěrowali a ideje za pólěpšenje situacije wuwijali. Pśi tom jo fokus lažał na pozitiwnem, což derje funkcioněrujo, a na pśichoźe. Pśibytne su pólěpšenja gódne zběrali a z tym zwězane zagronitosći resp. nagranjańskich partnarjow napisali a to systematizěrowali. Na to jo slědowało pśedstajenje rezultatow.