Diese Seite drucken

Pytaju rozgrono z nowym amtskim direktorom

Awtor: Gregor Wieczorek stwórtk, 11. julij 2019

Z Dešna/Dissen. Což nastupa pśiduce financěrowanje dešańskego muzeja, kněžy se nadalej patowa situacija. K dopomnjeśu: Głowny wuběrk bórkojskego amta jo we februaru swóju źělbu na financěrowanju dešańskego muzeja ze swójogo etata wušmarnuł ‒ 45.000 euro personalnych kostow ‒ měnjecy, až dešańska gmejna dej ju na jadno abo dwě lěśe njasć (Casnik jo pisał). Pśez to by mógali ten dank, ako gmejny na amt (Amtsumlage) płaśe, niski źaržaś, což buźo k lěpšemu chudych gmejnow.

Dešański šołta Fred Kaiser jo Casnikoju na našo dopšašanje gronił, až gmejnska rada njejo dotychměst te kosty do swójogo etata pśewzeła. Dešańske zastupniki ga su južo pśi tom wobspomnjetem wobzamknjenju pśipowěźeli, až njamaju prědk te kosty pśewześ. Šołta ma hyšći naźeju, až namakajo se lěpše, pšawdosćiwe rozwězanje, źož gmejna njebuźo jadnobocnje wobśěžkana. Wóni cakaju něnto, až nowy amtski direktor pśiźo znak z urlopa. Z nim kśě rozgrono wjasć, teke muzejowe towaristwo dej se na njom wobźěliś.

artikel pógódnośiś
(0 )
Pšosym zalogujśo se, cośo-li komentar dodaś