Kloštaŕ Lehnin jo w lěśe 1180 załožona něgajšna nimska abtaja cistercienziskich mnichow wósrjejź něga słowjańskego kraja, pódejśpjonego w běgu kśicnych wójnow pśeśiwo Połobskim Słowjanam. W schodach ku hołtarjeju jo zamurjowany skamjenjony dubowy štom, kenž nejskerjej póchada ze słowjańskego casa. Dendrochronologiske pśespytowanja, aby se zwěsćiło kradosćiwe starstwo drjewa, njejsu se dotychměst pśewjadli.

Jadno wulicowanje pśipišo štom boma nimskej załožeńskej legenźe ako pózdatny źěl „Ottowego duba“. Pó njej jo markgroba Otto I. (1128 – 1184) pód dubom chylu póspał. We sni jo se jomu zjawił běły jeleń. Ten jo kśěł jogo z rogoma zaštapiś, a markgroba Otto njejo mógał se zwěrjeśa ze swójim kopim derje dowoboraś. W takej nuzy jo wołał mě Krystusa, a skóńcnje jo se seń zminuła.