Ta njejadnosć, chto buźo za trenarja zgromadnego serbskego mustwa na Europeaźe 2020 wumjenjony, jo wurownana. To jo nam gronił trenaŕ Serbskich koparjow Horst Krawcyk (Krautzig) ze Žylowa. Wón a trenaŕ górnoserbskich balokoparjow Frank Rietschel buźotej se na zgromadnem treningu wšyknym grajarjam pśiducego mustwa pśedstajiś, a wóni budu we pótajmnem zgłosowanju zgromadnego trenarja wuzwóliś. Buźotej-li wobej trenarja jadnaku licbu głosow dostaś, ga buźotej se mjazy sobu zjadnaś, chto buźo głowny trenaŕ, a chto snaź co-trenaŕ (což jo derje móžno, pśeto to zgromadne mustwo buźo poł z našych, poł z jich grajarjow wobstojaś, a móžo byś, až kuždy buźo „swójomu“ trenarjeju swój głos daś).

Zaprědka su Serbske koparje wótšo póžedali, až Krawcyk dej trenaŕ byś, na žeden part Rietschel. Wina na tom jo, až su se culi wót Rietschela zajśpjone – wón jo za jich powěsću pór njewarjonych a njepjaconych słow gronił, z kótarychž su wu­znali, až na nich z wusoka glěda a jich zanicujo.