Z Pódstupima/Potsdam. Partaja Łužyska alianca njejo wordowała k lětosnemu krajnemu wuzwólowanju dopušćona. To jo nam k wěsći dał wjednik krajnego wuzwólowanja (Landeswahlleiter) Bruno Küpper. Na našo dopšašanje smy zgónili, dla cogo jo wuzwólowańska komisija póžedanje Łužyskeje aliance wótbiła. K prědnemu: Partaja by musała měś w Bramborskej wósebne wótźělenje (Landesverband), pśeto jano pśedsedaŕstwo takego bramborskego wótźělenja móžo krajnu lisćinu kandidatow wustajiś a póžedanje za wobźělenim na krajnem wuzwólowanju stajiś. Łužyska alianca pak wobstoj jano z jadnogo generalnego wótźělenja, ako źěła w Dolnej a Górnej Łužycy – a stakim w Sakskej a Bramborskej. Dla felowanja bramborskego teritorialnego wótźělenja jo krajna wuzwólowańska komisija póžedanje Łužyskeje aliance za njepłaśece rjaknuła (für ungültig erklärt) – stoj we wótegronje z Pódstupima. Wušej togo by musali 2.000 pódpismow pódpěrari nazběraś – a teke to njejsu cynili.