Z Wórjejc/Hoyerswerda. Dnja 10. apryla jo Sakska krajna centrala za politiske kubłanje w rěźe „Serbska debata“ pśepšosyła do Wórjejc na diskusiju wó pśichoźe Serbow. Pód moderaciju zagronitego redaktora Serbskich Nowin Marcel Braumann su pśedsedaŕ Domowiny Dawid Statnik, pśedsedaŕ Serbskego ewangelskego towaristwa Mato Krygaŕ a Tomaš Domaška ako zastupnik Serbskego sejma mjazy sobu a z 40 pśisłucharjami w zalu a pśez internet wó tom diskutěrowali, chto móžo serbski lud zastupowaś. Zajmce su pśišli z wšyknych stronow mjazy Čornobohom a Chóśebuzom.
Mato Krygaŕ, kenž póchada z Picnja, jo w diskusiji wuzwignuł, až we wósadach z mało Serbami lěbda něchten se za to zajmujo, kaku pšawnisku formu zastupnistwo Serbow ma, ale až spěchujo a pódpěrujo wše iniciatiwy za wužywanje serbskeje rěcy ako nejwažnjejšy zdonk serbstwa. Kandidat Serbskego wólaŕskego zjadnośeństwa trjeba za mandat w budyšyńskem wokrejsu 6.000 głosow. To pokažo, až dobre politiske zastupnistwo Serbow pśez Serbow pó źinsajšnych kazniskich směrnicach we wokrejsach jo lěbda móžne.