Z Budyšyna/Bautzen. Pód nadpismom „Prozniny z instrumentom“ jo Serbski ludowy ansambl w Budyšynje mjaztym stwórty raz źěłaŕnju k spěchowanju muzikaliskego dorosta wugótował. Wót jatšownego pónjeźelego až do slědujucego stwórtka jo se tam wobźěliło dogromady 21 źiśi a młodostnych wót źaseś až do 15 lět z cełeje Łužyce kaž teke z Drježdźan a Münstera. Pód wjednistwom Jana Brězana jo wuknuło dwanasćo wót nich w „klasiskem ansamblu“ – tam su fidlarje, dujarje, klawěr, akordeon a bijadła pódla byli. Su zwucowali dogromady tśi sajźby, kótarež jo Christoph Reuther na zakłaźe serbskich a dalšnych słowjańskich ludowych spiwow za nich komponěrował respektiwnje aranžěrował. Pó samskej wašni wót samskego awtora napisane tśi twóŕby jo zwucował „beat-ansambel respektiwnje band“ ze Symanom Hejdušku.

Probowali su w rumnosćach SLA a pśenocowali su w Budyšyńskej młodowni. Program za jich wólny cas jo wopśimjeł mjazy drugim woglěd inscenacijowu SLA „Folklora!“ a „Bubon Berta“, gromadne graśa a reje.