Gaž se w Serbskem domje, w muzeju w Dešnje, w muzeju w Janšojcach abo hynźi wótwórijo někaka wustajeńca z wobrazami, fotami a drugimi wuměłskimi twórbami, pón jo za wětšy źěl jaden luź z města pódla, kenž pilnje wšykno ze swójeju kameru wótmólujo. Jomu se groni Werner Brummack, a młoge se mysle, až ma wón jano wjele wušej za fotografěrowanje. Tomu pak tak njejo! Wóny muski wumějo teke wjelgin rědnje mólowaś ze šćotku. Kak a co – to móžomy něnto wiźeś we nowej wósebnej wustajeńcy w Serbskem domje w měsće, kótaruž jo tak ako pśecej wugótowała a pśigótowała Serbska kulturna informacija Lodka. Wótwórili su ju 14. apryla pód motom „Žywy byś w pśiroźe/Leben in und mit der Natur“, a wokoło 70 narskich luźi jo to pśiwabiło do Serbskego domu. Mólaŕ sam njeběšo taku wjeliku interesu wótcakował, jo, samo pśiswójźbne z města Ilmenau su pśijěli na ten wjacor. Chtož jo to skomuźił, ma pak hyšći až do 8. julija cas, se woglědaś Brummackowe mólby w klubowni Serbskego domu a „dołojce“ w Lodce. Dogromady jo jich wokoło 40 bildow, mólowane z tušu, z acrylom a z wólejowymi barwami.