Z Města/Cottbus. W ramiku wustajeńce „Rownowen do mólowanja“ jo Lodka zachadny stwórtk pód motom „Wuměłc, wobraz, tšojenje“ pśepšosyła na rozgrono z awtistiskim wuměłcom Johannes Hustädt. Mjazy 17 gósćami su byli galeristy, awtory, wuměłce, teke pśijaśele a maś wuměłca, Ingrid Hustetowa. Wóna a mólaŕka Monika Schubertowa stej na zachopjeńku cytałej dialog z titelom „Das kann ich“ a z tym wopytałej pokazaś, až wuměłstwo njejo jano pśedstajenje konkretnego, ale až teke abstraktne wobraze mógu emocije wubuźiś. Abstraktne ga su te twóŕby młodego mólarja. Wón se dajo rownowen do mólowanja w ramiku mólaŕskeje kupki za awtistow raz w tyźenju. Intuitiwnje mólujo to, což jo schowane w jogo pódwědobnju. Nic ned pó mólowanju, akle k pśigótowanju teje wustajeńce jo wón z pomocu swójeje maśerje wobrazam title dał a toś jo se jomu pśez rozgrona bytšniło, kótare emocije su te wobraze wobwliwowali. To jo derje rozměła Regina Herrmannowa, tekstilna wuměłcowka, dokulaž wóna teke źěła „ze zacuśa“ a z tym njewiźi jano, ale „cujo“ wobraze Johannesa Hustädta.