Z Miłoraza/Mühlrose. W nowem Miłorazu se wjele gibjo we tych nalětnych dnjach. Firma LEAG jo informěrowała gmejnske zastojnstwo Slěpe wó tom, až pśepódaśe nowego wejsnego centruma Miłoraza buźo 25. maja. To groni, až wejsny centrum ma se we tom casu hyšći wurědniś, wšak ma něnto južo pórědny naglěd. Ale pśesedlenje buźo oficielnje akle kóńc lěta dokóńcona. Młoge źěło how hyšći dajo, ale wjele jo južo widobne. Wójnaŕski pomnik jo dostał nowe městno, jo se 1:1 pśestajił a saněrował. To same płaśi za zwónicu, kótaraž něnto na zachopjeńku jsy stoj. A srjejź Miłoraza nadejźomy busowy cakański domcyk, kenž jo stojał w starem Miłorazu blisko gósćeńca „Zur Erholung“. Jo to pachany chrom, wuklinkerowany, teke we originalu zasej natwarjony.