Som se rozsuźił za praktikum w rěcnem centrumje Witaj w Chóśebuzu, dokulaž som tam měł wjele z rěcu cyniś, som był wót serbskeje rěcy wobedany, pśeto sobuźěłaśeŕki a sobuźěłaśerje powědaju ceły źeń serbski. Mimo togo maju w rěcnem centrumje wjele wucbnych materialijow.

Pśi mójom praktikumje som měł wjele casa za mnjo, dokulaž som pisał artikel za źiśecy magacin Płomje. We tom pśinosku pśedstajijom našu dujaŕsku kapału a wšake instrumenty, kótarež grajomy. To pśiźo ale akle we februarskem wudaśu Płomjenja w lěśe 2025. Mimo togo co redaktorka magacina Płomje Katarzyna Fidekowa mě w majskem wudaśu pśedstajiś. To jo rubrika „Z luštom a lubosću za to serbske“. Tekst som sam napisał, ale Katarzyna Fidekowa jo mě pomagała jen wuformulěrowaś.

Som měł wšake nadawki za Gundu Heyderowu, kótaraž jo zagronita za wucbne materialije za źiśi. Som wobraze wurězał a laminěrował. Wšake artikle z rěcnego wucbnego materiala som wuproběrował a jej gronił, lěc su lažko abo śěžko rozměś.