Bóžko njejo wuznamny serbski komponist, muzikowy wědomnostnik a lawreat Myta Ćišinskego Detlef Kobjela mógał swóje 80. narodniny dožywiś, kótarež by slědnu njeźelu zawěsće w Budyšynje mjazy pśiswójźbnymi a pśijaśelami wóswěśił. Wón jo wšak pó dłujkej chórosći 18. maja 2018, w starstwje 74 lět, w budyšyńskej chórowni zemrěł.

Detlef Kobjela jo se 7. apryla 1944 we familiji serbskego pjakarja w Rogoznje (Willmersdorf) naroźił. Tam jo chójźił na wejsnu šulu a se wobźělił na wucbje serbšćiny. Wó njogo jo se starała druga nanowa manźelska. Nan jo powědał serbski. W pjakaŕni jo wón rad pśi źěle dolnoserbske ludowe spiwy spiwał. Nan jo se teke wó to starał, až jogo syn wót 6. lětnika na Chóśebusku ludowu muzikowu šulu (źinsa konserwatorium) pśiźo, źož jo wuknuł na klawěrje a wiolinje graś. Pó zakóńcenju 8. lětnika jo se pódał Detlef Kobjela na Rozšyrjonu wušu šulu w Chóśebuzu. Tam jo rad we awli, sejźecy za kśidłom, komponěrował. Togodla su sobuwukniki jogo lubosnje pomjenili „Mozart“. Wěsty cas jo wón ako wušy wuknik samo šulski chor nawjedował.