Z Města/Cottbus. Jadna kupka našych hortowych źiśi z Janšojc jo w prozninach na woglěźe w Serbskem muzeumje w Chóśebuzu była. Tam su měli z kuratorku Christinu Kliemoweju wobejźenje pó jatšownej wustajeńcy. Wósebnje zajmowali su se źiśi za rědnučke jatšowne jaja, kótarež su se ze wšakorakimi metodami wupyšnili. Teke druge jatšowne nałogi su wjeliku rolu grali, pśeto źiśi su ga mógli w muzeumje z grajnymi jajami walkowaś a samo pó jatšownu wódu hyś. Ako źowća su teke gólcy z wjelikim wjaselim sobu cynili a zwěsćili, až doźaržanje pšawidłow – to groni mjelcanje – njejo tak lažko. Źowća su byli pśi tom widnje zwucone; pla gólcow jo pón ale tola raz plapotata wóda nastała. Z małym kwisom su mógli swóju wědu dopokazaś. Za to jo kněni Kliemowa někotare jaja ze wšakorakimi wjelikosćami a barwami pśigótowała a je źiśam pokazała. Samo emu-jajo jo pódla było a fascinaciju napórało. Na kóńcu su mógli źiśi hyšći sami jatšowne jajo na škrabanem wobrazu wupyšniś.