Z Hochoze/Drachhausen. Jadno zarědowanje slědujo za drugim we Hochozy, w kjarcmje „Złoty plon“. Pśed dwěma tyźenjoma jo se wótměła źiwadłowa premjera graśa „Smjerś pó štuckach“, slědnu sobotu jo pśepšosyła Šula za dolnoserbsku rěc a kulturu na „Serbske wótpołdnjo“. Lubosnje wugótowany program jo docakał tych wušej 60 gósći. Toś te su pśišli z cełeje Dolneje Łužyce.

Wjednica šule Uta Hentšelowa jo wótwóriła wótpołdnjo ze swójeju koleginu Šarlota Kušcyc a ze šołtu Hochoze Ronny Henke. Jomu jo wóna wósebny źěk wugroniła za góspodowanje a až jo se ten zal k dispoziciji stajił. A teke Ronny Henke jo se wjaselił wjelikej licbje gósći – a až se wótmějo Serbske wótpołdnjo zasej we Hochozy.