Wjerbno/Werben. Šesć rejtarjow w swójich běłych zecach a běłych zgłach a šesć źowćow w swójich kradu perfektnych serbskich wjerbańskich drastwach jo stojało w srjejźišću glědanja swěźeńskego pśeśěga pśez wjas na rejtowanišćo. Kim Hankel jo serbski wuwitał wobźělnikow a gósći a Laureen Groschischka nimski: „Swěśimy źinsa tradicionelny serbski młoźinski swěźeń, kokot. Wšym, kenž su pśi pśigótowanju pomagali, słuša naš wutšobny źěk. Wósebnje comy se wuźěkowaś Marcusoju Brameroju, wón jo nam lětosa kokot darił. Rejtarjam słuša našo pócesćenje, až su tak zmužne, na kónje zalězć. Duch płodnosći jo se južo našym pśedchadnikam zjawił. Móc kokota wobwliwujo wukóńc žnjow. Móc kokota dej pśejś na nejwěcej zmužnych a skobodnych.“