Chóśebuz/Cottbus. Koncept za bilingualnu wucbu až do abitury, kótaryž Dolnoserbski jo šulskemu amtoju prědkpołožył, njejo hyšći taki, ak to wustajenje za serbsku wucbu (Sorben/Wenden-Schulverordnung) a za bilingualnu wucbu pśikažo. Šula dej toś na njom dalej źěłaś. To jo gronił šulski raźc Ulrich Hirthe ze šulskego amta na wobradowanju Serbskeje rady zachadny tyźeń wałtoru w klubowni Dolnoserbskego internata.

K dopomnjeśu: Ministarstwo za kubłanje a šulski amt pominatej wót šule, až dej źěłaś we wobjadnosći z tyma górjejka spomnjetyma wustajenjoma ministarstwa. Což groni: kuždy wuknik dej měś bilingualnu wucbu we dwěma wěcnyma fachoma (Sachfächer) wót zachopjeńka až do abitury. Dla tog, až wucbna rěc we tyma fachoma jo serbska, deje wšykne wukniki w sekundarnem schójźeńku I pśidatnu serbsku wucbu, aby naslědku kuždy – teke zachopjeńkarje – serbsku rěc tak derje wobkněžył, aby mógał bilingualnu wucbu póžywaś.