W aktualnem „Rozhlaźe“ jo wětšy źěl tekstow górnoserbski – něco na dolnoserbski – a zajmne temy za Was su ale zawěsće pódla. Ze swójeju basnju „Tebje“ wezmjo Źilka cytarjow sobu na zmakanje mjazy bokami dnjownika. Wót H. Leipnera zgónijošo, lěc mógu zachopjeńkarje z awdijowyma kursoma „Serbski lažko“ se pušćiś na zmakanje z dolnoserbskeju rěcu. Mimo togo luštnje rozkładujo, co ma abo njama pšawa pśijaśelka z wuspěšnym wuknjenim serbšćiny cyniś. Dalej wupórajomy se ze St. Bierholdtec do srjejźneje Łužyce, źož su 25 lět Slěpjańske kantorki statkowali. Něco ze Slěpego su tež woglědowarje wustajeńce „Zeitsprünge“ w Drježdźanach wiźeli. A.-S. Lohmann jo tam wustajiła drastwu slěpjańskego źiśetka, kótaruž jo pó rešeršach sama wugótowała. W rozgronje wulicujo, kak jo drastwa nastała.