Pódstupim/Potsdam. 16. maja jo wobradowała rada Załožby za serbski lud w Pódstupimje. Tema jo był teke Serbski muzej w Chóśebuzu. Muzej jo wót januara 2016 zacynjony, dokulaž dej se dom modernizěrowaś a nowa stawna wustajeńca natwariś.
Pśed połtera lětami jo muzej signalizěrował, až trjebaju poł miliony euro wěcej za wustajeńcu. Załožba za serbski lud pak jo se woborała jim pomoc. Załožbowa rada ga jo wobzamknuła, až dej se ten projekt z mjenjej ako 500.000 euro spěchowaś. Až do 2016 jo Załožba južo wušej 300.000 euro za koncepciju a planowanje noweje stawneje wustajeńce wudała. Lětosa planuju wudaśa we wusokosći 47.000 euro a za 2018 stoje 150.000 euro w planje.
Na pósejźenju Załožboweje rady 16. maja jo rozpšawił Berndt Weiße, cłonk Załožboweje rady a decernent města Chóśebuz. Jo k wěsći dał, až twarske źěła w muzeumje pśidu derje doprědka a budu až do kóńca 2017 dokóńcowane. 2018 budu wopśimjeśe wustajeńce pśigótowaś, jo gronił. Weiße licy z tym, až buźo nowa stawna wustajeńca zachopjeńk lěta 2019 wótwórjona. Móžno jo to wšykno pśez to, až buźo město Chóśebuz dalšne 300.000 euro za tu wustajeńcu wudaś.