Su swěśili 100. jubilej cerkwinych zwónow

Z Dešna/Dissen. Gjardy jubilej jo tudejša ewangelska wósada swěśiła na njeźeli kantate (to jo było drugi maj). W lěśe 1921 su tśi nowe zwóny zachopili swóju „słužbu“. Jaden dešański zwón jo w zymjem 1771 rozskócył, tak zyma jo było. Jogo „naslědnik“ z bronze su we wójnskem lěśe 1917 zeškrěli. Toś jo tencasny faraŕ Bogumił Šwjela dał zwónylejarjam firmy „Glockengießerei Schilling & Lattermann“ nadawk, tśi zwóny pśigótowaś za dešańsku cerkwju. Ten nadawk jo na dwójaki part był wósebny: K jadnomu jo se pominało, až zwóny deje byś zelezne a nic bronzowe, ako jo zapšawym był nałog. Wóno se groni, až faraŕ Šwjela jo měł starosći, až teke w pśiducej wójnje by zeškrěś dali cerkwine zwóny. Wušej togo jo Šwjela kśěł, aby na tych tśich zwónach stojali bibliske słowo w serbskej rěcy. Na małem zwónje stoj KNĚŽO, HUMOŽ NASS (Matejus 8,25). Na srjejźnem zwónje stoj „BOJ SE BOGA, LUBUJ BRATŠA“ (1 Pětš 2,17). Na wětšem zwónje stoj „WOJNA A MĚR MA SWOJ CAS“ (Prjatkaŕ 3,8).