ŹO, GA, CO? ZAPISK TERMINOW
Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).
Terminy (21.11.24)
Cottbus/Chóśebuz
Serbske gódy
Šula za dolnoserbsku rěc a kulturu Was pśepšosyjo stwórtk, 28. nowembra, wót zeger 15:00 do 17:00 do Serbskego doma na serbske gódy. Pśizjawśo se pód 0355/79 28 29.
Nowa wustajeńca w Serbskem muzeju pokažo keramiku
W Serbskem muzeju se wótwórijo pětk, 29. nowembra, zeger 18:00 nowa wósebna wustajeńca, kótaraž prezentěrujo twóŕby wuměłcowki Heidrun Bastianoweje z Dešanka, kótarejež keramiki a kolaže se ako zajmny ansambel prezentěruju. Lawdaciju buźo źaržaś Stephan Kaiser, za muzikowy ramik buźo se staraś Lu Schulz ze saksofonom. Wuměłcowka buźo na tom wjacorje tek pódla a pśez wustajeńcu wjasć. Wacej móžośo wustajeńcu „Heidrun Bastianowa – w žwałach – keramika a kolaža“ hyšći wiźeś až do 23. febraura 2025.
Adwentski koncert
Adwentski koncert Serbskego ludowego ansambla ze sobustatkowanim chora Dolnoserbskego gymnaziuma buźo njeźelu, 8. decembra, zeger 17:00, w awli Dolnoserbskego gymnaziuma. Bźezbarierowy pśistup jo zawěsćony. Pód muzikaliskim nawjedowanim Kathariny Dickopfoweje se pśednjasu swětosnje wobmysliwe orchestrowe twóŕby serbskeju komponistowu Helmut Fritsche a Jan Rawp ako teke smyckowa serenada E-dur 22 Antonína Dvořáka a suita Petera Čajkowskego „Wórjechowy knapak“ op. 71. Wuknice a wukniki rědownje 9B Dolnoserbskego gymnaziuma wutšobnje pśepšosuju woglědowarjow na spódobny adwentny kafej. Wót zeger 15:30-16:45 móžo se publikum koncerta pśi spódobnej zgromadnosći z kafejom a gódownym pjacywom na pówažnu muziku nastajiś. Kórtki dajo w Serbskej kulturnej informaciji Chóśebuz, online pód www.ansambl.de a pśi wjacornej kasy.
Bórkowy/Burg
Michael Becker cyta w Błośańskej bibliotece
Chóśebuski źiwadłownik a awtor wulicowańkow, Michael Becker, buźo pětk, 22. nowembra, zeger 19:00 gósć w Błośańskej bibliotece „Mina Witkojc“. Pśi sceniskem cytanju wón buźo pśedstajiś wulicowańka a anekdoty ze swójogo žywjenja. Kórty dostanjośo za 10 euro/z „GästeCard“ za 9 euro w pśedpśedani pśi turistiskej informaciji, teke telefoniski pód 035603/750160 abo pśi wjacornej kasy.
Zušow/Suschow
Serbske tšojenja z pśěze
Šula za dolnoserbsku rěc a kulturu Was pśepšosyjo pětk, 22. nowembra, wót zeger 16:00 do zušojskego gmejnskego doma. How dožywijośo wótpołdnjo z tšojenjami ze serbskeje pśěze.
Lübbenau/Lubnjow
Gódowne dary sam wuplasć
W lubnjojskej Galeriji „Utaciani“ pokažo Wam wałtoru, 26. nowembra, zeger 18:00 Peter Lehmann, kak móžośo sami něco plasć, což se ako rědny gódowny darik góźi. Za wobźělenje pśizjawśo se pla Šule za dolnoserbsku rěc a kulturu.
Vorstandssitzung der Spreewaldfischer
Die nächste Vorstandssitzung der wendischen/sorbischen Spreewaldfischer Burg und Umgebung findet am Dienstag, den 26. November, um 19:00 Uhr im Gasthaus Lucas in Fehrow statt.
Auf der Tagesordnung stehen u.a. Eröffnung und Begrüßung, Protokollkontrolle, Abgabe Mitgliederlisten der Ortsgruppen, Vorbereitung Jahreshauptversammlung und Verschiedenes.
SERBSKE RYBAKARJE
