ŹO, GA, CO? ZAPISK TERMINOW
Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).
Terminy (03.04.25)
Cottbus/Chóśebuz
Literarny salon: „Tak ja to wiźim“ – serbske kolumny na nimski
Literarny salon „Sowohl als auch“ a Dolnoserbska biblioteka pśepšosyjotej wutšobnje na wjacork z wuzwólowanymi kolumnami Serbskego radija lět 2018 až do 2025 w nimskej rěcy. Gósć wjacora buźo kolumnist, bibliotekaŕ a pěsnikaŕ Bernd Pittkunings, kenž ma teke muzikaliske wobogaśenje na starosći. Městno: Eck 51, Dwórnišćowa droga 51 w Chóśebuzu. Cas: Wałtoru, 8. apryla, wót zeger 18:00. Zastup jo dermo.
Nalětny koncert
Dolnoserbskego gymnaziuma
Wałtoru, 8. apryla, se wótmějo wót zeger 17:00 do 18:00 we awli Dolnoserbskego gymnaziuma (DSG) lětosny nalětny koncert z chorom DSG.
Slěpe/Schleife
Serbske wiki jatšownych jajow
Sobotu, 5. a njeźelu 6. apryla, zeger 10:00 do17:00, pśepšosyjo Serbski kulturny centrum Slěpe na 26. Serbske wiki jatšownych jajow. Nagromadu 34 wuměłcow z Łužycy dajo se pśez ramje glědaś pśi wupyšnjenju filigranych wuměłskich twóŕbow. Pisany muzikaliski program caka na Was, mjazy drugim sobotu, zeger 14:30 chor Židźino, zeger 15:30 mandolinowy orchester Cersk. Njeźelu wobogaśiju jatšowne wiki zeger 10:00, Serbski źiśecy ansambel Slěpe, zeger 13:30 gerce Serbskego folklornego ansambla Slěpe a zeger 14:30 Grodkojske gólańske gerce, zeger 15:30 akordeonowa kupka Slěpe.
Baršć/Forst
Serbski studijny źeń we wokrejsnem zastojnstwje SPN
Gromaźe ze Šulu za dolnoserbsku rěc a kulturu Chóśebuz póbitujo wokrejs Sprjewja-Nysa zajmowanym wobydlarjam a wobydlaŕkam srjodu, 9. apryla, wót zeger 09:00 do 14:30 móžnosć, se na serbskem studijnem dnju wobźěliś. Zachopjeńk wugótujo dr. Pětš Šurman z pśednoskom „Serby we ,Tśeśem rajchu‘/Das Wendentum – ein behüteter Edelstein im ,Dritten Reich‘? Sorben/Wenden zwischen 1918 und 1945“ wót zeger 9:00 do 10:30. Dalej źo ze „Symboliskimi znamjenjami wokoło jatš“ z docentku Utu Henšeloweju zeger 10:45 do 12:15. A wóna Wam w tśeśem pśednosku dnja hyšći pśedstajijo „Serbske rěcne wobroty za kuždu góźbu, mały rěcny kurs“, ga wót zeger 13:00 do 14:30. Studijny źeń se wótmějo na Droze Heinricha Heinego/Heinrich-Heine-Straße 1 w Baršću, w tamnem rumje C.2.04. Se za to pśizjawiś pla wokrejsneje zagroniteje za serbske nastupnosći Romy Ruffowa móžośo hyšći až do pětka, 4. apryla – z mejlku na abo telefoniski na numer 03562 986-10005.
Rowne/Rohne
Wupyšnjenje serbskich jatšownych jajow
Na Njepilic dwórje wupyšniju jatšowne jaja, a to sobotu, 12. apryla, wót zeger 14:00.
Budyšyn/Bautzen
Wustajeńca wó awtochtonych mjeńšynach
Serbski muzej prezentěrujo wót 6. apryla nowu wósebnu wustajeńcu pód titlom „Was heißt hier Minderheit? / Što rěka tu mjeńšina? / Co ga ma to groniś – mjeńšyna?“, kótaruž jo Mjeńšynowy sekretariat a Dolnonimski sekretariat naźěłała. Wóna drogujo mjaztym tśi lěta pó Nimskej a jo prědny raz w Sakskej, w Serbskem muzeju w Budyšynje wiźeś.
Noc bibliotekow w Centralnej bibliotece Budyšyn
Serbska centralna biblioteka (SCB) pśepšosyjo na „noc bibliotekow“, a to pětk, 4. apryla, wót zeger 18:00. Wóna se wobźělijo prědny raz na cełonimskem zarědowanju, lětosa pód motom „wědu źěliś a nadejś“ („Wissen.Teilen.Entdecken“) w Serbskem instituśe na Dwórnišćowej droze 6 w Budyšynje. SCB informujo wó swójej źěłabnosći, móžnosćach rešeršěrowanja a wužywanja, a mimo togo póbitujo cytanja, mjazy drugim pśedstajijo dr. Robert Lorenc „Statistiku łužiskich Serbow“ z lěta 1886 (w nimskej rěči) Arnošta Muki.
Źiśi, model, barwa a papjera
Z Gołbina/Gulben. Kreatiwne wugótowanje kórtow som póznała pla wuměłcowki Susanne Krusowa (Kruse). Wóna jo sama swójske modele zgótowała. Z tym móžoš se rědnučke wuměłske twóŕby a teke kórtki śišćaś. Dnja, 21. měrca, som planowała w ramiku mójeje źěłabnosći pśi Dolnoserbskej kulturnej akademiji póbitowanje za źiśi z wuměłcowku w Gołbinje.
Wšyknym źiśam a dorosćonym jo se pokazało śišćanje z rědnymi modelami, barwami a wšakorakimi papjerami. Pśi tom jo dało tipy, triki a informacije k wšakim technikam a wugótowanjam. Źewjeś źiśi a teke starjejše su wósebnje lubowali zwěrjece figury ako na pśikład kócku, kokoš a sowu. Teke wjele wšakorakich kwětkow a łopjenow jo se jim spódobało.
Źiśi su se samostatnje wjele pisanych barwow změšali a su casy samo wuglědali ako wuměłska twóŕba. Wóni su byli teke rědnje pisane. Pó tśich góźinach smy wiźeli rědnučke wobraze. Pśi zgromadnem rumowanju smy planowali ze starjejšymi južo pśiducy kurs.
Zachopjeńk nowembra buźo workshop za dorosćonych. My zgótujomy pón pód rozpokazanim Susanne Krusoweje modele a buźomy je ned testowaś. Na to se južo wjelgin wjaselimy. Něnto źěkujomy se wutšobnje Susanne Krusowej za kšasne wótpołdnjo.
Dolnoserbska kulturna
akademija / Astrid Šramina
Regionalny źeń pśi filmowem swěźenju Drježdźany 2025
Z Drježdźan/Dresden. Srjodu, 9. apryla 2025, se wótmějo zasej „regionalny źeń“ w ramiku filmowego swěźenja Drježdźany w Lingnerowem grodu (Lingnerschloss), na Budyšyńskej droze 132, lětosa ga w znamje serbskego filma. Zeger 16:00 pśepšosujotej dla togo Filmowy zwězk Sakska (Filmverband Sachsen) a Serbso-nimska filmowa seś Łužycafilm ze Załožbu za serbski lud na filmowy program „Wiźeś. Sichtbar. Widźomne.“
Pśedstajijo se „Serbska utopija I und II“, fikcionalna kolaža ze šesć bejnje rozdźělnymi krotko-filmami. Pód titlom „Sagenhaft sorbisch“ su zeger 19:00 wiźeś wurězki z historiskich serbskich filmow, kótarež su w ramiku kooperaciji digitalizěrowali. Muzikaliski pśewóźujo k wětšnemu źěloju nime filmy Paul Geigerzähler. Etnologiske a (film-)historiske aspekty rozkładujotej dr. Theresa Jacobsowa a dr. Robert Lorenc wót Serbskego instituta.
Mjazy wobyma zarědowanjoma pśepšosyjotej Filmowy zwězka Sakska a Łužycafilm wót zeger 18:00 na małe pśiwitanje. Zastup jo dermo, ale pšosy se wó pśizjawjenje na . Kórtki za program „Sagenhaft sorbisch“ dostanjośo pśi filmowem swěźenju Drježdźany. Dalšne informacije dajo Wam Angela Šusterec (Schuster) pód .
