Z Budyšyna/Bautzen. Z Górneje Łužyce smy dostali tužnu powěsć, až wjeliki a znaty serbski komponist, muzikowy wědomnostnik a lawreat Myta Ćišinskego Detlef Kobjela jo pó dłujkej chórosći zachadny pětk w chórowni w Budyšynje zamrěł, 74 lět stary.

Detlef Kobjela jo se naroźił na 7. aprylu 1944 we familiji serbskego pjakarja w Rogoznje/Wilmersdorf pla Chóśebuza. Tam jo chójźił do wejsneje šule a wót 6. klase do Chóśebuskeje muzikoweje šule (źinsa konserwatorium), źož jo wuknuł graś na klawěrje a wiolinje. Ako wuknik tencasneje Serbskeje rozšyrjoneje wušeje šule jo se aktiwnje na kulturnem źěle swójeje šule wobźělił a wochylu samo šulski chor nawjedował. Z tym zrownju jo se prědne raze wopytał we komponěrowanju. Jogo prědna kompozicija, skomponěrowana na kśidle (Flügel als Instrument) w šulskej awli jo była na dolnoserbski tekst Kita Lorenza „Noc běšo śicha“. Toś, jogo sobuwukniki su jomu lubosnje narjakli „Mozart“.