Błośański cerkwiny źeń su swěśili 9. septembra w Dešnje. Nowy Casnik jo slědny tyźeń južo krotko wó tom pisał. Z wósadow Dešno-Žylow, Brjazyna, Gołkojce, Wjerbno, Bórkowy a Popojce-Kśišow jo pśichwatało wokoło 350 namšarjow. Mjazy nimi su byli luźe teke z dalšnych wósadow; źělnje su to byli serbske luźe. A južo krejz wobźělonych pśi pśigótowanju a wugótowanju cerkwinego dnja jo licył wušej hundert luźi. W serbskej drastwje su byli někotare žeńske z Dešna, ze Žylowa, Města a dalšne. Mjazy nimi jo była zasej dešańska fararka a serbska dušepastyrka Ka­tharina Köhlerowa.

Namša jo była we wjele dypkach dwójorěcna. Tak su wugótowali głowne bjatowanja tak, až jo mógał kuždy we swójej rěcy bjatowaś. Psalm 23 su wšykne we wobyma rěcoma bjatowali a kjarliže su měli cesto serbsku štucku.

Spiwał jo namšy „błośański chor“ z dogromadu 60 luźimi pód nawjedowanim Lydije Budyšynoweje. Spiwarki a spiwarje su cłonki chorow wobźělonych wósadow.