Pśedsedaŕ Towaristwa za serbsku rěc w cerkwi dr. Hartmut Leipner jo wobswětlił źěłabnosć Albinusa Mollerusa na pólu astrologije a astronomije. Tegdy, na zachopjeńku „nowego casa“ (epocha pó srjejźowěku) njejo granica mjazy nima była hyšći wótša.

To běźenje heliocentriskego a geocentriskego modela swěta jo hyšći trało. A teke wucone luźe su wěrili, až gwězdy a planety su měli wucynk na kjabel luźi, kaž teke na wjedro, na žni a na móc gójecych zelow. Astronomy su wiźeli na njebju zjawjenja, kótarež teke nowa Kopernikowa wucba njejo pśemógła rozkłasć: k eksemplu wjazym kometow abo nastaśe nowych gwězdow. A stakim su wóni je wukładowali ako Bóže znamje.