Z Grodka/Spremberg. Serbska namša w Grodku? Młogi jo se źiwał a jo pśichwatał 17. měrca do wósadnego domu Kśicneje cerkwje w Grodku.

Toś ten wósadny dom jo zwuraznje wjeliki a rědny. Namšarje su zgónili, až jo ten chrom ta něgajšna serbska cerkwja w Grodku, natwarjona wót Schinkela. Južo 150 lět njejo tam wěcej žedna serbska namša była. W 1960ych lětach su z teje cerkwje wugótowali wósadny dom kśicneje wósady. Kśicna cerkwja stoj jano pór mejtarjow zdalona. Su do nowego wósadnego doma zatwarili mjazywjerch a su wugótowali górny nastwark ako wósadny zal. Rědnje z wjelikimi a wupyšnjonymi woknami, hołtarjom, orgelami a samo z modernym wjelikim liftom. Ten jo nastał we 1990ych lětach, ako su ten wósadny dom saněrowali. Dołojce jo we wósadnem domje městno za wósadne rumnosći a zastojnstwo.